|
|
|
|
 |
D'aicí e de'n pertot |
 |
 |
Rugbi ; de Rocavion a Clarmont au Mondiau dau Japon. Andrieu ABBE |
 |
|
 |
| 16 / 02 / 2020 |
402 lu(s) |
 LO BILHET DE ANDRIEU ABBE
De Rocavion a Clarmont au Mondiau dau Japon
A l’ocasion dau torneg de rugbí dei Sièis nacions de 2020, Andrieu Abbe nos remembre un pauc l’istòria de nòstre espòrt nacionau…
Un pessuc d'istòria... a la naissença dau torneg dei "Four Nations", lo Board avié chausit leis espacis lenguistics per crear leis equipas : englés, galés, gaelic d'Escòça, gaelic d'Irlanda. D'aquèu temps, aquelei four nations èron dins un solet estat.
Ailàs, quora lo Board a convidat la França per lei "Five Nations", a pas considerat que lei país de lenga d'Oc (ente lo rugbi era fòrça mai espandit) si meritavan una equipa nacionala a l'egau d'Escoça, Galas (Cymru), Irlanda. Venguèt puei Itàlia per lei "Six Nations".
Ansin en setèmbre, leis Occitans de Rocavion faràn lo tifo per Itàlia e aquelei de Clarmont per França. A Roma e Paris avèm de monde que fan lei fiers tre que leis equipas nacionalas fan de belugas. Bastava d'ausir lei jornalistas lo jorn de la victòria de França au mondiau de foot en 18. Mai en 2019, au Japon, Italians e Francés si duvràn tenir chut, estènt que sensa una intervencien chanuda de la "Boana Maire", leis uns e leis autrei s'arrestaràn a la fin dei partidas de pola.
Dins la pola B, leis Italians jugaràn còntra New- Zeland e South Africa, ren qu'aquò ! Sabèm que li aurà que dos qualificats. Urosament ganharàn contra la modesta Namibia per començar lo dimenche 22 de setembre, faràn pas faní.
Dins la pola C, lei Francés sauràn tre lo 21 còntra leis Argentins se pòdon esperar jugar lei 1/4 de finala. Leis Englés faràn promiers de la pola, probable. Si podèm demandar perqué siam renduts a faire tapissarié còntra leis anglo-saxons dei dos emisferis.
En Itàlia, lo rugbi resta un "pichon" espòrt luenh darnier lo calcio. En mai d'aquò, lei melhors jugaires italians son estats sampalhats dins lei melhors clubs d'Euròpa, coma Parisse au Stade Français, Castrogiovanni au RC Tolon...
En França, lei melhors jugaires mondiaus venon coma de moscas sus lo mèu per ramassar lei melhorei pagas dau monde e lei joines jugaires locaus lei regardan jugar assetats sus lei banquets deis estadis. Lei clubs amators de Federala 1 (tresena divisien), elei tanben crompan de Blacks, de Sudafs, d’Argentins, de Romanès, de Georgians… e d’Italians.
Convendrié de limitar lo nombre de forestiers per cada club, arranjarié tanben lei país d’origina dei dichs forestiers. Lei melhors Georgians juegan totei foara Georgia. Aquò bessai si farà avans lo Mondiau 2023.
Mai ara ne’n siam au Mondiau 2019 ; si faudrà levar d’ora per si tancar davant sa telé. Au Japon, emperi dau Solèu Levant, lo solèu a 7 oras d’avança e nautrei aurem bessai quauqueis assais de retard.
Andrieu Abbe
|
Retorn
|
|
|
 |
|
|
|
|
