Acuelh / Accueil
Editoriau / Editorial
D'aicí e de'n pertot
Sociau / Social
Politica / Politique
Istòria / Histoire
Cartabèu/Bloc-notes
Societat / Société
En revista / En revue
Botica / Boutique
Forum
Contact

   
   

D'aicí e de'n pertot


LO BILHET D’ANDRIEU ABBE. Guy, Renaud e Bachar
30 / 12 / 2019 398 lu(s) 
          
LO BILHET D'ANDRIEU ABBE

          Guy, Renaud e Bachar      

    L'asard de mei barrulatges m'aduguèt a Damàs quatre mes avans la debuta de la revòuta còntra Bachar el Assad e sa chorma. Mon filhòu Cristou que travalhava en Jordania m'aviá dich en avost 2010 de l'anar veire avans Novè  que puei se'n tornariá a Caire. Anèri en Aman en octòbre, puei un divendres sa frema Dalia, joina e polida Egipciana, voguèt anar faire de crompas a Damàs. Vaquí qu'aviam partit en taxi a la frontiera. Avieu ges de visat mai Dalia faguèt un sagan e lei policiers me lo donèron, ne'n siguèri estonat. A Damàs, degun auriá poscut si pensar que la castanha anava petar. Cadun fasiá son trin, lei pedons plan-plan, lei veituras dins un pati pitoresc e la policia si mostrava gaire. Solet signe de flicatge, mon telefon barrulaire cranejava, quauqu’un l'aviá mes en pana.

   Au centre de Damas, davant la ciutadèla medievala avieu trovat un monument espetaclós, bastit en 1993, a la glòria de Saladin (1138-1193), victoriós dei Crosats (sei desfachas son oublidadas a Damàs). Ajocats sota lo Saladin, Guy de Lusignan (1159-1194- rei de Jerusalem e de Chipre) e Renaud de Chatillon, autre catau crosat, tenián en man de saquets clafits de l'aur raubat ais onestas populaciens localas. Aquèu monument cargat d'una ideologia un pauc somària auriá poscut aculhir Afez el Assad e son enfant Bachar que dempuei quaranta ans fan sa fortuna sus l'esquina dau pople sirian que si cerca lo Saladin dau tresen milenari per faire justícia. Mi demandi encuei quora Damàs tornarà trovar sa tranquillitat d'aquel auton 2010?

   Un paralèla si pòu faire entre la tresena Crosada aquèla qu'an menada lei reis Richard Còr de Lion e Philippe Auguste mé lei Guy, Renaud e quauquei miliers d'òmes armats e lo chaple actuau dau sanguinari Bachar. La principala causa d'aquelei conflits es religiosa mai que sociala vo politica. Leis Assad son d'una minoritat chiita, sostenguts per l'Iran chiite, mai lo pòple sirian es en majoritat sunita.
   Lei luchas d'influenci entre lei doas principalas sectas de l'Islam an encara creissut dempuei la segonda guerra dau Gòlfe e l'ensems dei musulmans ne'n pagaràn lei consequéncias..., mens bessai que lei crestians d'Orient que duvon ara chausir entre la valisa vò la caissa.  

Andrieu ABBE


Retorn