Acuelh / Accueil
Editoriau / Editorial
D'aicí e de'n pertot
Sociau / Social
Politica / Politique
Istòria / Histoire
Cartabèu/Bloc-notes
Societat / Société
En revista / En revue
Botica / Boutique
Forum
Contact

   
   

Editoriau / Editorial

MIGRACIONS - Quand s'arramba la "pensada novèla" (Occitania/Lo Cebier N° 206)

18 / 10 / 2016 

MIGRACIONS
Quand leis Estats esquivan sei responsabilitats,
Quand lei mediàs plantan un chut,
S’ARRAMBA LA « PENSADA NOVELA »

   Siam malurosament acostumats a la rumor mediatica qu’espandísse de novèlas meçorguieras sus la realitat dei migrants que  la misèria e la guèrra forabandisson  de son país. Es lo fons de comerci de la drecha extrèma e dei frontistas que ne’n fan, ambé lo securitarisme e l’identitarisme, la bandiera de sa campanha presidenciala. E aquò marcha mai que cresètz dins lei discutidas de cafè, burkini e « guèrra dei civilizacions » i fan miranda. Dins lei vilatjons lo monde comença de se maufisar ambé cu parlar per pas « desparlar ». Lo filtre de la « pensada novèla », mai que jamai duberta e non esconduda, foncciona de mens en mens. Un conse frontista marselhès fa passar la mocion còntra la reparticion dei migrants de Calais que vendrián a Marselha. Quauquei desenas per arrondiment es de tròp. Es ara l’estrategia aplicada dins lei comunas per lei frontistas. Ges d’aplicacion de la Convencion de Geneva (1951) signada per leis Estats europencs, que se’n anan ! A oblidat lo pairòu d’accuelh e de transformacion dei populacions vengudas sempre plantar cavilha dins aquela vila ligura, greca e romana.  Un ambient faissisant es a mand de venir la tèla de fons de la vida vidanta… Mèfi, faissisme en formacion !

   E mai siguèsson nombros, lei captaus partisans de la desinformacion sus aquela question son bravament ajudats per lei mediàs quotidians de granda difusion. Jògan son ròtle de mediators oficiaus e refortisson la paraula politico-mediatica oficiosa. A cadun son ròtle.
- Mai perqué lei mediàs dison pas lei chifras oficiaus dei migrants ?
- Perqué dison pas que la chifra reala de la populacion intrada en Suèda es dotze còps mai granda comparada ambé la populacion novèla arribada dins l’exagòne ?
- Perqué dison pas que França es classada vintena sus trenta dins l’aira pròcha europenca d’accuelh e que lei migracions d’ara son pas ges l’èrsa que va tot submergir,  nimai un pseudo « conflicte dei civilizacions » ?
- Perqué lei mediàs escondon lei grandei migracions darrieras, ligadas ambé de situacions de colonizacion per leis Estats europencs ?
- Perqué plantar un chut sus aquestei chifras que tot demograf conoisse : 10% de migrants au sègle XIX dins lo monde, còntra 1% d’aquesta passa?  Siam luench de l’invasion anonciada, luench dei realitats viscudas per lei populacions de nòstrei país provençaus. Lo sindròme de l’estrangier es a de córrer a l’après de monde que lo nom ven d’a vegadas d’una immigracion passada… Lo mirau remanda pas sempre l’imatge esperat. Lo sindròme de l’insecuritat  es enlusit per de monde que lei valors son portadas per la proprietat individuala mai estrechoneta… e que, dins lei vilatjons, conoisson pas ges d’estrangier ! Tot aquò es lo simbòl d’una perda dei valors, d’una cultura tradicionala aflaquida e en devenir, d’una demografia anciana de poplament sens lei condicions culturalas d’accuelh, d’un discors egalitarista qu’esconde e justifica un sistèma economic e d’inegalitats socialas dei mai grandas. Convivéncia, avètz dich ?

   Lei causas son claras : denonciar la manipulacion de l’Estat, lo silençi de tròp d’elegits, quand ne’n apondon pas a aquesta perda de sen e de responsabilitat collectiva. Sens oblidar que leis Estats e Euròpa an de trobar lei mejans indefugibles de solidaritat, per passar lo genocidi morau que conoissèm.  La batèsta democratica que ven, l’esperam. Se farà  ò se farà pas a l’entorn d’aquelei questions d’integracion diferenciada e de ciutadanatge dubert. Per dire que la question de la drecha extrema e de l’extrema drecha es pas segondària, es la batèsta màger d’encuei e de deman.

Gerard TAUTIL

Traduccion : http://locebier.free.fr
--------------------------------



Leis editoriaus precedents