Acuelh / Accueil
Editoriau / Editorial
D'aicí e de'n pertot
Sociau / Social
Politica / Politique
Istòria / Histoire
Cartabèu/Bloc-notes
Societat / Société
En revista / En revue
Botica / Boutique
Forum
Contact

   
   

Editoriau / Editorial

Faire AVANS (Lo Cebier n° 120))

08 / 12 / 2010 

Faire avans!

   La difusion deis idèas occitanistas e l'afortiment dau Partit Occitan passan per lo melhorament de la vesibilitat dau Partit Occitan. Per aquò, tot lo mond s'acòrda per dire que la solucion  passa per una exisisténcia pròpia subre lo terren. Leis experiéncias d'aquelei setmanas passadas nos mòstran que cada còp que lo Partit Occitan es estat en mesura de se mobilizar subre lo terren, lo POc a tirat un benefici evident. Pensi aqui ai protestas socialas, a l'acamp public sus leis avançadas politicas en favor dei lengas amenaçadas sus Marselha o a l'AG de Region Provença. Toteis aqueleis eveniments qu'avèm sauputs organizar son de capitadas per mantunei rasons:

- ressons mediatics: lo Partit Occcitan patís d'un desinterest segur de la part de la premsa. Rarei son lei comunicats que son reprès per lei mediàs. Pas mens, fau admetre que cada còp qu'avèm sauput portar un eveniment, avèm agut un article dins la premsa. Es verai per l'acamp de Marselha (article de la Provence) e es verai tamben per l'AG de Region Provença (article de Var Matin). Mai fau tamben notar la fotografia presa a Tolon dau panèu "60" inspirat dei panèus de signalizacion rotièra, fargat per nòstre amic Robèrt Gago dau comitat tolonenc per illustrar dins totei leis edicions de Var Matin, Nice Matin, Corse Matin, lei passa-carrieras còntra la reforma de Sarkozy.
   Aquest esclairatge mediatic nos prova que lo melhor biais per comunicar es l'accion. Cò que vòu pas dire pasmens que fau arrestar d'escriure de comunicats, non. Lei comunicats son necites:
1/ per clarificar un posicionament politic pròpi sus l'actualitat;
2/ assabentar la premsa e au delai, tot lo malhum de difusion qu'avèm a travèrs, lei militants, lei simpatisants, Europe-Ecologie, etc.

L'accion deu èstre de lònga perfin que la beluga se transforma pas en fuèc de palha

- atraccion e credibilitat: notadament a Marselha avèm poscut apreciar lo fach que lo Partit Occitan podiá recampar l'ensems de la familha culturala occitana de Provença e mai en delà. Venguèron a l'acampada: lo President nacionau de Calandreta, lo President nacionau de l'IEO, lo representant de l'Ostau dau Pais Marselhés, lo majorau dau Felibritge, lei responsables dei jornaus d'expression occitana en Provença, Aquò d'Aqui e Prouvenço d'Aro. Venguèron tanben la co-presidenta dau grop Europe-Ecologie-Les Verts-Partit Occitan deis elegits au Consèu Regionau de Provença, Na Aicha Sif, mai tamben de militants de EELV. Avèm constatat tamben que lei comunautats Amazgihs e Curdas se podián mobilizar en favor d'una crida lançada per lo Partit Occitan.
   Tot aquò per dire que l'avenidor dau POc siam nautrei que l'avèm entre lei mans: serèm çò que farem.
                                                                                                                                                             Pèire Costa



Leis editoriaus precedents