|
|
|
|
 |
Editoriau / Editorial |
 |
 |
França totjorn per una morala internacionala "sens obligacion ni sanccion" |
 |
|
 |
09 / 04 / 2008 |
 |
| |
França totjorn per una morala internacionala “sens obligacion ni sanccion” !
Un còp de mai, França es mostrada dau det per una instancia… internacionala. Segur, serà pas lo Conseu constitucionau que va farà, mai una expèrta independenta pròchi dau Conseu dei drechs de l’òme de l’ONU. Dòna Mac Dougall faguèt un rapòrt que denoncia la situacion dei minoritats nacionalas en França.. Per lo costat “raciau” dei libertats d’èstre et d’anar dins la vida vidanta manca pas de dire que lo racisme es totjorn present dins la discriminacion a l’emplec, au lotjament e au fàcies, per exemple, a l’intrada dei discotècas.
La question dei drechs culturaus e lingüistics es dintre lo rapòrt de sintesi :”De representants dei comunautats que parlan lo catalan e l’occitan afortisson tanben que la non-reconeissença ò l’abséncia d’estatutoficiau mena a un diminucion constanta dau nombre de personas que parlan lo basc, lo catalan ò l’occitan, tant en percentatge coma en chifras absoludas a tau ponch que, maugrat lei recomandacions deis organs antidiscriminacion de l’Union Europenca e de l’ONU,aquelei lengas en dangier son pas mai utilizadas que dins l’esfèra privada, çò qu’a d’incidéncias au còp lingüisticas e culturalas.”
Aqueste rapòrt remembra que França a totjorn pas ratificat la “Carta-quadre europenca dei minoritats nacionalas dau Conseu d’Euròpa, nimai “ la Carta europenca dei lengas regionalas ò minoritàrias”. Adonc demanda a l’Estat francésde “reconeisser l’existéncia de minoritats nacionalas ò etnicas, religiosas e lingüisticas (...), de levar sa resèrva a l’article 27 dau Pacte internacionau sus lei drechs civils e politics per lei personas qu’apertenon a de minoritats, e a l’article 30 de la “Convencion relativa ai drechs de l’enfant”.
Es pas tot : la represententa de l’ONU demanda a França de “ratificar leis instruments europencs relatius ai drechs de l’òme sus lei drechs dei minoritats, subretot lo Protocòl n°12 a la Convencion de sauvagarda dei drechs de l’òme e dei libertats fondamentalas e mai la Convencion-quadre dau Conseu de Euròpa per l’aparament dei minoritats nacionalas”.
Aqueste paqueton per faire la tiera dei mancas ai Drechs de l’òme que França remembra de contúnia coma estent LA tèrra d’espelida dei drechs umans e dei libertats fondamentalas. Siam dins l’esfèra de la cresença. Cu diguèt que seriam dins lo monde dau doble lengagte e deis enganas juridicas?
A vosautrei de jutjar..
Gerard TAUTIL
|
|
|
| |
|
|
|
