|
|
|
|
 |
Editoriau / Editorial |
 |
 |
P...de foncionaris! (Lo Cebier N° 103) |
 |
|
 |
24 / 09 / 2007 |
 |
| |
P… de foncionaris !
Andrieu Santini, secretari d’Estat encargat de la foncion publica, cònse de Issy-les-Moulineaux, qu’a capitat dins la foncion publica « territoriala » e dins l’aparelh d’Estat, ven d’empurar lo gavèu còntra lei « sèt milions » de foncionaris que fan partir lo budget en barigola. E coma podèm aver lo burri e l’argent dau burri per aquelei d’amondaut, la productivitat d’unei sectors es a la baissa. Bota ! Aquela foncion publica , en competicion amé lo sector privat, te la fau saunar un pauc. Aqueste discors es de mòda e fau ben dire qu’es pas solament a drecha que l’ausissèm. Dins la senèstra « modernista », l’avèm tanben rescontrat. Remembratz –vos dau sénher Allegre, ministre de l’ensenhament de L.Jospin…
Lo “socit”, coma se ditz ara dins lo patoas estereotipat dei medias, es pron dins la poncion dei sectors que fan virar la maquina sociala : la santat, l’ensenhament e d’autrei sectors d’interès public au servici de la collectivitat. Levatz de postiers que son de mens en mens titularis, e la Pòsta es ja pron malauta, levatz d’ensenhaires dins lei ZUP, levatz de personaus de santat dins lei vilas e lei vilòtas, auretz un profiech a tèrme cort e la depression d’aquí entre aquí. E lo discors sus lei regims especiaus fa pas qu’escondre aquela realitat darrier un còmpte d’apoticari : la reduccion dei drechs que lo travalh penós aviá ganhats, sota l’escampa que la modernizacion tecnica a cambiat lo procés dau prezfach. Çò qu’es verai per part, mai cambia ren a la reduccion deis efectius e dau metòde de mesa en pre-retirada tre que possible dins aquelei sectors. Adonc, aitant de ganhs de productivitat…
L’a mai qu’aquò. Sénher Santini mente, trafegueja lei chifras. Per un economista que se ten a la definicion estricta d’un foncionari, en 2003 i aviá 5,2 milions de titularis d’un pòste dins la foncion publica (200 000 ambé un contract ajudat) e 800 000 travalhant dins d’organismes d’administracion publica (cambra de comerci, escòlas superioras de comerci...) siá un pauc mens de 6 milions de personas salariadas d’organismes non mercants.(1) Adonc, entre un e tres milions de mai per A.Santini, aquò fa pas sèt milions de foncionaris stricto sensu.
Am’aqueleis espepidonaires, i a totjorn un perfum de naftalina: lo foncionari es aqueu que fa ren, qu’es sempre en situacion de sota-produccion. E tant que l’Estat se desconcentrarà sens se reformar fonsament dins lei territòris, foncion publica compresa, aurem aquestei discors de petaçaires impotents e sufisents. Lo cònse-secretari d’Estat, A.Santini, a trobat dins l’ataca dau foncionari una escampa per evitar la vertadiera reforma de l’Estat e parlar pas de la redistribucion dei mejans, a respèct dei besonhs. P... de foncionaris! Bota anatz, coma la cordèla es gròssa!
Gerard TAUTIL
(1) Observatori de l’emplec public : www.fonction-publique.gouv.fr/rubrique114.html
|
|
|
| |
|
|
|
