Acuelh / Accueil
Editoriau / Editorial
D'aicí e de'n pertot
Sociau / Social
Politica / Politique
Istòria / Histoire
Cartabèu/Bloc-notes
Societat / Société
En revista / En revue
Botica / Boutique
Forum
Contact

   
   

Editoriau / Editorial

(N°88) - Euròpa : la granolha e lo gau gallès

03 / 06 / 2005 

Euròpa : la granolha e lo gau gallés

Ambé lo succès que coneguèt lo NON dimenge passat, es lo retorn a  la casa zerò per Euròpa. La pojada deis oposicions solublas a passat l’òsca dei compromés e lei predicators dau catastrofisme se son acampats dins una postura que, maugrat leis aparéncias, fan pas que perlongar abriu de 2002, un 2002 de l’envèrs, mai sens solucion politica novèla. Lei Manu, Fabian, Bufeca, Malanconi, Besança, lei partidaris dau gau gallés, an pas que recuolat dins sa virada mediatica en disent que França es França e qu’Euròpa es de tròp dins una bastison istorica autra. E gonfla la granolha. En resson, l’aristocracia vilheristo-lepenista que parla ultraliberalisme e demagogia populista a bodre. Degun per compensar l’autra; la senèstra faguèt pas dins la dentèla dins son nacionalisme sociau-etatista que lo beneficiari siguèt lo plombier polonés. La paret dei lamentacions franco-francésas se bastís sus una tradicion exagonala sempre actuala. Una Europa politica a turtat lo nacionalisme reborsier dau gau gallés e deis eurosceptics de servici. Anem, siam en plen gallicisme antieuropenc que la revendicacion sociala, tan se pòu legitima, a en aparéncia escondut.

Verai, la sopassa liberala chiraquiana barrejada de rafarinadas populistas es mai que mai malaisada d’engolir. Lo gonfle dei Rmistas, dei sensa lotjaments, dei caumaires tancats dins la precaritat, lo vueje d’avenir per de joines sensa travalh, tot aquò te fabreja una mescla explosiva dei grandas. Siam pas estats darriers per denonciar l’esplecha quotidiana dei ciutadans instrumentalizats en  maquina de produrre, quand de travalh i a…. Mai refusam la demagogia dau transferiment e la falsificacion obrierista que la tradicion es una constanta de la senèstra francesa. Verai, lo maucontentament s’es tranferit sus una Euròpa que volián pas politica. E l’argument anti-liberau, subran descubert per de monde qu’an dich de Òc a l’Acte unic, s’es tornat en demission politica. Dempuei cinquanta ans lei tractats europencs son estats liberaus. Dempuei Niça, lo tractat calamitós es estat denonciat per lei comunistas, mai sens sortida dau governament per Dòna Bufeca. Es una realitat ara mentenguda gràcia au NON. Sénher Salassa (president de la fondacion Copern’ic), conselhier dau ministre dei Transports, Gayssot, anticapitalistas ben coneissuts, an liberalizat lo fret, vos rapelatz? Leis obriers dau camin de fèrre èran còntra lo governanent, parier per leis obriers dei “Chantous” navaus, vos rapelatz? Lo Malanconi, dents blancas defòra sus lei platèus de televisión, ancian ministre de Jospin, a pas partit dau governament, vos rapelatz ? Rementar aquestei fachs en campanha electorala rescòntra lo silenci. Curiós, non ? Cu se sente sociau-democrata, se moque!

Aquò es aquò. Cu dirà lo contrari? L’impoténçia de la senèstra per cambiar de politica se perlònga dins un transferiment psicanalitic tras que classic: l’Euròpa dau liberalisme còntra França capitalista. Am’ un retorn au tractat de Niça sensa lei Drechs fondamentaus. Puslèu que de passar una etapa dins la bastison d’Euròpa, lo retorn sensa condicion a d’eventualitats mai socialas en Exagonia, la cagada d’una Europa rebutada dins la reire botiga d’una istòria franchimanda son la resulta d’una vista corteta e sans amira.
Nautrei aviam fach lucidament la chausida d’anar mai luenh. Sens illusions. O planhèm pas.

Ara esperam lei còntra proposicions sus Euròpa anonciadas en campanha per nòstreis altermondialistas que volián subretot pas faire de politica (lo Bové escondèt pron ben son juec) e d’aquela senèstra que, dins lo bestiari politic, retraís de la granolha de la faula. De Gaulle se morís dau rire dins l’ataüc. L’ibridación dau gau e de la granolha te fa una dubertura pron inesperada. Lo bestiari se melhora dins sa version nacionalista esterila. S’arresta pas lo progrès.

Gerard Tautil     (30/05/2005)




Leis editoriaus precedents