|
|
|
|
 |
Editoriau / Editorial |
 |
 |
Se lo poder regionau donava d'ajuda ai servicis publics... |
 |
|
 |
11 / 12 / 2004 |
 |
| |
Se lo poder regionau
donava d’ajuda ai servicis publics...
Lo 23 d’octòbre, 263 elegits de Cruesa (cònses, conselhiers municipaus e un conselhier generau an mandat sa demission au prefèct de despartament en signe de protesta còntra la disparicion dei servicis publics dins son territòri. Aquest moviment a ganhat Arièja, Aups, Ardescha (Espitau de Sant Agrèva), Avairon e mai Marna Auta.
D’efèct lo prefèct incarna lei dos responsables d’aquest desmantelament dei servicis d’interès generau : la politica neoliberala menada per lo governament actuau e lo centralisme parisenc.
La concentracion dei mejans economics, industriaus e financiers a París obliga lei joines a quitar sa region vèrs la capitala. La desertificacion rurala que vèn d’aquest exòdi forçat arrisqua de tuar lei servicis publics en causa de la disparicion deis usatgiers, pas pron nombrós.
Lo governament, que pensa premier rentabilitat e privatisacions, suprimís a cha pauc lei servicis d’interès generaus sensa se preocupar dei consequéncias sanitàrias e socialas per lei estatjants dei regions occitanas. Aquestei, subretot en mitan rurau, se tròban despoderats dei servicis publics, tot pagant d’impòsts tant importants coma lei parisencs. Vaquí la concepcion centralista de l’egalitat respublicana : egalitat davant l’impòst mai pas ges fàcia ai servicis publics!
Entre lo desengatjament de l’Estat e l’impoténcia administrativa deis elegits municipaus, leis Occitans, tenguts per ciutadans minors, assiston desvariats a la barradura deis escòlas, espitaus, burèus de pòsta.La sauvagarda dei servicis publics passa donc per l’escalon regionau, sol capable de raprochar eficaçament lei poders de decision dau ciutadan e de porgir una alternativa ai directivas amagestradas a París per de tecnocratas alunchats dei realitats de terren.
Per tenir targa a aquela degradacion economica e sociala, lei transferiments de competéncias de la capitala vèrs lei regions an de se desvolopar e èstre accompanhats vertadierament dei mejans budgetaris necessaris per assumir aquestei cargas novèlas.
Lo Partit Occitan convida tanben lei presidents dei regions occitanas a se recampar per trabalhar de cotria a la bastison d’un plan de manten dei servicis publics en mitan rurau.
|
|
|
| |
|
|
|
