|
|
|
|
 |
Editoriau / Editorial |
 |
 |
Per una responsa politica e non comptabla a la crisi sociala |
 |
|
 |
30 / 05 / 2003 |
 |
| |
Per una responsa politica e non comptabla
a la crisi sociala
L’occitanisme es a la crosiera.
Lo movement sociau que travèrsa lo país butassa certituds e esquèmas de pensadas. D’unei seguisson la reaccion de defensa dei sindicats, d’autrei vos dien que lo sistèma liberau es arribat a cima, per çò que ren pòu cambiar ; de modèls de remplaçament n’i a gaire... D’unei encara, que lo centralisme francés es a de se tornar faire una santar ambé l’agarrida dau sector public qu’es lo camp dei privilegiats, valent a dire dei drechs aquerits ; d’autrei, (bensai pas totjorn lei memei), que lo privat se tròba dins una situacion d’injustícia grèva e que fau reequilibrar lo sistèma dei retiradas.
Per anar lèu, nos fau pas oblidar la decentralizacion Raffarin que vèn “regionalizacion” dins l’opinion publica de gaucha- subretot sindicala dins l’expression publica-. La confusion deis esperits, dei mòts, la convergéncia dei reflexes de defensa, l’abséncia de responsa novèlas, tot aquò fa bruch qu’es pas de dire...
Lo Partit Occitan que vou èstre lo partit d’una identitat dubèrta e tanben una expression occitana per mai de justícia sociala, se dèu de respondre ais espèras. Fugisse pas lo debat, lo demanda mai que jamai quand, de’n pertot, la solidaritat entre Occitans es compromesa e que la situacion sociala se gasta. Alora nos fau respondre ambé clartat que :
- la decentralizacion Raffarin es pas nòstra e que farem pas d’embolh en fasent creire que la fau acceptar e mai siegan lei consequéncias. Es pas qu’una cerca de diminucion budgetària per l’Estat e de cargas suplementàrias per la Region. La concertation a pas jogat, la democracia de “proximitat” es estada decretada en aut. N'avèm la version tecnocratica. Pasmens, la responsa sindicala faguèt pas pròva d’imaginacion. S’es verai qu’un sindicat sèrve premier en la defensa dei trabalhadors, regretam qu’aquela responsa s’acontentèsse d’acompanhar un movement de defensa sensa còntra-proposicions.
- la question dei retiradas puei es pas que la seguida d’una situacion que la gaucha a pas vòugut bailejar. Sus aquela question, lei dètz ponchs dau programa Jospin son vuèjas de proposicions precisas. D’un autre latz, lo govern a chausit la posicion dau Medef : baissar de dètz ponchs la massa salariala dintre la valor ajustada dins lei vint ans venent. Çò que revèn a donar lo gasanh de la productivitat ai capitalistas sols. Dins aquelei circonstàncias, l’argument demografic permete de refusar un carcul de la retirada per reparticion. Sabi pas perque d’uneis acceptarián una logica comptabla que se vira còntra la majoritat, mentre que lei mercats financiers son portaires de beneficis jamai mès au servici de la collectivitat.
Mai que jamai, dins lei dos cas, decentralizacion e retiradas pòdon pas recebre de responsa progressista.
Faudriá pas que leis occitanistas se laissan enganar per la manòbra dei Fillon-Raffarin. Es per aquò que fau èstre dins lo movement sociau per contunhar d’aparar cotria nòstrei revendicacions per mai de solidaritat e de justícia sociala. Segur que la responsa a la desparticion dei richessas es politica. Lo sistèma a tot dich, pòu pas que se repetir. Entre una gaucha que faguèt, au poder, una politica liberala e neo-jacobina e una drecha enfortida dins sa logica ultra-liberala dei profiechs, vesèm pas una volontat politica per dire : “volèm una regionalizacion democratica e una autra desparticion dei richessas”.
Es per aquò que prepausam : la taxacion de la valor ajustada, lo contraròtle dei licenciaments dins leis entrepresas, la creacion d’un esparnhe etic per ajudar lei micro-entrepresas en dificultat. Mai de justícia sociala per lo privat es l’enauçar au nivèu dau sector public. Aquela recerca d’equitat passa per lo manten dei cotizacions per desparticion e lo refús dau desembolhament, de l’individualisme, la presa en compte de la penibilitat dau trabalh dins la partença a la retirada.
Aquelei chausidas, se son pas realizadas, au risque de deçaupre leis espèras, favorizaràn la montada dau FN. Luench d’una gestion comptabla, la responsa a la crisi sociala es politica.
Es a nosautrei d’aparar tota proposicion que farà avans..
Gerard TAUTIL
|
|
|
| |
|
|
|
