|
|
|
|
 |
Editoriau / Editorial |
 |
 |
Legislativas : Votatz per vautrei! |
 |
|
 |
16 / 04 / 2002 |
 |
| |
Editoriau N°71- Març/Abrieu de 2002
LEGISLATIVAS :
Fàcia a la « Societat deis Estatistas Reünits »,
Gents dau Pais d’Òc,
VOTATZ PER VAUTREI !
Un còp de mai aqueleis eleccions presidencialas son lo revelator dau malèstre francés. Un còp de mai, la division Senèstra-Drecha serà una fuelha de vinha per la flaquesa deis idèas e la reproduccion dau sistèma. Un còp de mai, la transversala sobeiranista serà lo signe de l’introbable renovelament de la politica. Dins cada camp, s’atropela lo còs d’indispensables complices en bosca de pichòtei frasas e d’idèas cortas. Espectacle tritàs e desolacion garantits. D’un caire, un Senèstra que lo bilanç es maigre, de l’autre una Drecha que pensa tornar au poder per faire, a quauquei diferéncias raras, parier… Que sabèm pron que ren de nòu sortirà d’aqueleis eleccions a cima onte lei ciutadans son, de còps que i a, espectators ò electors desencantats.
Fasèm lo còmpte. Refòrma de l’Estat e de la constitucion ? Se ne’n parlarà pas. Refòrma territoriala e fiscala, competéncias alargadas per lei regions ? Ne’n somiatz pas. Refòrma lingüistica et culturala ? Tot es estat dich. Lo debat politic es mestrejat mediaticament, dins una coabitacion que quita pas de…coabitar. Dins aqueleis entremièjas, gaire estonant que lo bonapartisme de Chevènement tròba condicions d’espandiment entre un Pasquà que s’es encalat e un Le Pen totjorn en pista. Leis autrei candidaturas seràn dins la dificultat d’aqueste juòc centrista que fugis tota innovacion, levat lei candidaturas esquèrristas que son lo cant dau ciune de l’Estat.., un Estat mantengut en l’estat ! Avèm agut una campanha de VRPistas. Lei Verds qu’a pas sachut impausar un discors clar sus lo domeni de la sieu revendicacion van pagar fòrça car sei divisions. Per l’opinion publica, an perdut un credit de simpatia qu’avian dempuèi lei darrieras presidencialas. Per nautrtei que lei sostenguèriam mai d’un còp, en causa de sei posicions de principi sus la refòrma de l’Estat e lei lengas minorizadas, podèm faire lo bilanç magrinèu de ço que ne’n ditz son candidat dins seis intervencions publicas de campanha. An pas mai parlat de la campanha « Pour que Vivent nos Langues », campanha comuna qu’an estremada au tirador deis objèctes perduts. An pas sachut trobar lo là que dòna lo ton d’una campanha reborsiera dins la
« Societat des Estatistas Réünits ».
Alora, quora aurem la resulta obtenguda per Jospin ò Chirac, serà malaisat dins un temps tras que cortet de faire montar una alternativa politica que pensam de nòstre costat. Pasmen i aurà entre 30 e 40 candidaturas presentadas ai legislativas per lo Partit Occitan e sostengudas per « Régions et Peuples Solidaires ». En Provença, 8 a 10 candidat(a)s seràn presenta(da)s sota l’empenta de R&PS dins totei lei regions .
Occitanistas de Provença, Provençalistas, se volètz pas redaurar lo blason de la França etèrna, declinada en 16 versions oficialas, siguètz ambé aquelei que fan pas promessas, votatz ai legislativas per vautrei, votatz « Régions et Peuples Solidaires » !
Gerard TAUTIL
Vocabulari :
Lo malèstre : le malaise/ S’atropèla lo còs... : se regroupe le corps../ en bosca : à la recherche/ sobeiranista : souverain/ a cima : au sommet/ desencantats : désenchantés/ dins aqueleis entremièjas : dans ces circonstances/ espandiment : expansion/ encalat : échoué/ cant dau ciune : chant du cygne/ magrinèu : maigrichon/ estremat au tirador : rangé dans le tiroir/ reborsier : à contre-courant, contraire/ Estatistas : étatistes/ sota l’empenta : sous la direction/-
|
|
|
| |
|
|
|
