|
|
|
|
 |
Politica / Politique |
 |
 |
Quauquei reflexions sus leis eleccions regionalas. Estève BERRUS |
 |
|
 |
| 07 / 09 / 2021 |
403 lu(s) |
 Quauquei reflexions sus leis eleccions regionalas
De qué pensar deis eleiccions regionalas per nautrei, occitanistas provençaus? Pensi qu'es una capitada : de’n premier la lista a existit, çò qu'èra pas ganhat a la debuta. EELV e la senestra nos an ignorats, fugueriam un moment observator, an fach coma s'existiam pas. Me diretz qu'avián pron a se carpinhar entre elei. Nautrei avèm traçat nòstra rota e lo resultat de 2,18% es ben, còmpte tengut de nòstre fòrabandiment dei debats televisats, que sigue lo servici public FR3 ò lo privat LCI e la pressa que nos an considerat mai d'un còp per una lista “folclorica”. Avèm ganhat en credibilitat, visibilitat e avèm la confirmacion que se nautrei siam ecologistas, la màger part deis ecologistas son pas regionalistas. Té, es bòn de se rementar aquò.
Quant a l'abstencion, es que lo mond se pensan pas concernit per la politica; cu que sigue elegit, deman anirai trabalhar parier. N'i a que dison que vèn de l'alargament dei regions? Pasmens la nòstra a pas cambiat e i a pas agut mai d'electors per aquò ; sola Corsega i a per part escapat ! Ara, per la màger part deis electors, lo poder es pas dins lo politic, es dins lei mans dei multinacionalas e dei fons de pension, Paris fa que tenir lei correjons dau borson, e seguís Brussèlas, « alora, pensatz se me vau bolegar per leis eleccions regionalas. Leis eleccions son una engana ! »
E mai per la covid, es « un conseu de defensa » que fa lo trabalh, e lei politics charran de “separatisme”, de “securitat”. Pauc a cha pauc, nos levan de libertats au profiech dei podents. La resulta de l'eleccion es tant democratica que Muselier es a crear un « comitat consultatiu » ! Degun se pausa la question : « perqué aquela creacion, coma se fa, venèm de votar ? » Se lei conselhiers regionaus tot bèu just elegits nos representan pas, i a quicòm que pica, leis eleccions sèrvon vertadierament a ren. Es pas aquò que va menar lo mond a votar. Oblidetz pas que se vos ocupatz pas de politica, lei politics, elei, s'ocupan de vos. Es necite de cambiar lo sistèma electorau se vòlon que l'abstencion demenisse.
Estève BERRUS |
Retorn
|
|
|
 |
|
|
|
|
