Acuelh / Accueil
Editoriau / Editorial
D'aicí e de'n pertot
Sociau / Social
Politica / Politique
Istòria / Histoire
Cartabèu/Bloc-notes
Societat / Société
En revista / En revue
Botica / Boutique
Forum
Contact

   
   

Politica / Politique


Catalonha en Provença Maritima. G.Tautil
28 / 06 / 2018 59 lu(s) 
CATALONHA EN PROVENÇA MARITIMA

-Tolon, 8 de junh.

   Lo Collectiu per la Solidaritat ambé Catalonha aviá engimbrat aquela serada tolonenca, sala Bortolaso. Aqueste collectiu aviá espelit fa dos mes a l’iniciativa dei representants deis organisacions despartementalas (1) e mai de cinquanta personalitats varesas (2). S’èran donats per tòca d’informar sus la situacion catalana en fàcia de la premsa exagonala, especialista de la desinformacion sus « la crisi catalana » (sic) e d’una Euròpa deis Estats au remòuc de la politica de M. Rajoy (avans sa sortida …).

   S’èran junts a aquesteis escambis la deputada catalana Anna Gèli (representanta dau Val d’Aran, Catalonha), Gerard Onèsta, representant internacionau au referendum de decembre 2017 e elegit a la Région « Occitanie » (EELV), Gustau Aliròl, responsable dei questions europencas au Partit Occitan. La serada èra animada per Pèire Còsta, de Regions e Pòble Solidaris, que sachèt pron ben presentar leis intervenents e menar leis escambis.

         Au nom de la Republica

   Gerard Onèsta, per vidéo-conferéncia, assabentèt la sala de son experiéncia d’elegit de terren (ancian deputat europenc, tanben) sus la repression policiera de la Guardia civil espanhòla, donant d’explicas sus la non participacion democratica de Euròpa, a l’encòp d’exemples viscuts dins lei burèus de vòte ambé lei personas presentas. Just e just la paur de la policia d’una vièlha frema qu’aviá votat de non e que demandava ais observators internacionaus de se’n anar pas ! Remembrava, per aquelei que va sabián pas que, ren dins lei tèxtes fondators de l’Euròpa (dau mercat comun !), nimai dins lei tractats seguents, podià respondre coma es estat fach a la demanda democratica d’un pòble que vòu se despartir de l’Estat d’origina. Aimant mièlhs butar vès la responsabilitat juridica deis Estats pertocats… Remembrava mai la responsabilitat d’un Estat de semblança democratica, eissut dau franquisme que la constitucion de 1978 se pausava coma indefugibla dins lo temps. E de tractar a bòn drech lo sistèma espahnolista de mafiós : lo ministre de l’Interior es aquel òme que participèt au còp d’Estat de l’extrema drecha de l’après franquisme…

   Anna Gèli, una frema jova engatjada dins una batèsta lòngassa, portèt son testimòni sus l’aspiracion democratica d’un pòble en Marcha (es pas lo meme !) que lo referendum e lo vòte seguent n’avián fach que refortir. Es pas la proporcion dei votants totjorn mesa en davant (48%) per la premsa madrilena e parisenca que changèt quauqua ren a la determinacion  d’un pòble que dempuei vint ans es a d’afortir a cada escrutin son avançada democratica. La contèsta per l’Estat de l’estatut autonòm, tre la debuta de son installacion, aurà agut per responsa l’auçada d’una consciéncia independentista. La situacion politica catalana es a de metre en question una estabilitat estatala enganarèla que la sortida de M. Rajoy, mes en minoritat,  chanjarà pas grand causa ambé lo socialista Sanchez. Lo PSOE liberau a ren de veire ambé sei proposicions socialas dei premiereis annadas e lo sobeiranisme estrategic esta sempre la linha constanta. La carta de jogar es pas un jocker trufarèu mai una seria d’actes refondators per la democracia per totei. L’etapa seguenta, ambé lo retrach de l’article 155 e la « legalisacion » dau governament catalan, laissa pas de caire la question dei presoniers politics, dei faidits e responsables politics, e l’avançada de l’idèa independentista.

  Gustau Aliròl mostret clarament que dins una Euròpa deis Estats, la politica deis Estats que vòlon pas metre en question sa sobeiranetat nimai laissar plaça a de responsabilitats partejadas, es lo premier barri a tota democracia politica europenca. Lei questions juridicas son pas de rèsta per temptar de reglar la quadratura dau ceucle. Mai ren dins lei tèxtes europencs s’opausa au drech dei pòbles a dispausar de son autonomia politica, quina que ne  siá la forma. E lei Drechs aparats per l’ONU son per confirmar aquela realitat democratica. Es vertat que son aplicacion laissa la question entreduberta puslèu que de la reglar au còp per còp. Pasmens, l’avançada de reculons sus aquestei questions fan pas que sotalinhar lei crespacions l’Euròpa dei Barroso e Junker que nega tota tranformacion politica cresibla d’avenir.

   Uneis escambis siguèron fachs, malurosament tròp cortets en rason dei mesuras de barradura de la sala municipala. De sindicalistas e de militants dau quotidian donèron son ve- jaire. La buta de la serada èra complida maugrat una participacion tolonenca pron insufisenta e una premsa absenta, levat nòstreis amics de Aquò d’Aqui e una entrevista de A. Gèli dins Var matin la velha. Un rampèu de Arvèi Guerrera, conselhier municipau a-s-Ais, siguèt fach per remembrar lo combat dei republicans catalans dau sègle XIX e l’acuelh  dei Provençaus a Balaguer, a l’origina de la Copa santa.

   Se pòu comprendre que la libertat d’èstre es un drech fondamentau per un pòble que se pausa coma tau. A eu de trobar lei formas de son combat e lei chausidas politicas de metre en plaça.
                                                                                                                   G. Tautil

-------------
(1)Organisations : Federacion Regions e Pobles Solidaris, Europe Écologie Les Verts 83, PCF 83, NPA 83, Partit Occitan varès.
(2)https://varcatalogne.wixsite.com/var-catalogne
Retorn