Acuelh / Accueil
Editoriau / Editorial
D'aicí e de'n pertot
Sociau / Social
Politica / Politique
Istòria / Histoire
Cartabèu/Bloc-notes
Societat / Société
En revista / En revue
Botica / Boutique
Forum
Contact

   
   

Politica / Politique


Politica culturala - Lo Forum d'Oc floris e grana - Alan Barthélémy-Vigouroux
29 / 03 / 2017 37 lu(s) 
Provença, País Niçart, País Gavòt

         Lo Forum d’Oc florìs e grana

   Avèm dejà parlat mai d’un còup de la dinamica creada en Provença pèr lo dispositiu dau Forum d’Oc, graci a n una iniciativa conjoncha de l’IEO e dau Felibrige. A sa tresièma anada d’eisistènci, a pas arrestat son envam, e n’avèm agut una novèla pròva lo dissata 18 de Mars que lo Forum tenié sa Convencien anuala dins la vila de Partus en Vauclusa.

   Era l’òucasien pèr quatre comunas de concretisar son adesien au Forum en recebènt lo diplòma que n’es lo simbòle emé leis insinhes dau labèu « Reconoissut garant de l’òc » que porran desenant si nen prevaler dins sa comunicacien. Li èron representats Partus naturalament, e lei comunas vesinas de La Bastidona, La Torre, e Mairarga. Maugrat la campanha, pron d’elegits èron presènts e la granda sala de l’Ostau de la Cultura de Partus èra un pauc justa pèr caupre una assistança nombrosa e atentiva.

  Lo presidènt dau Forum, lo majorau dau Felibrige Gui Revest, dreiçava lo tablèu de la situacien presènta, mé lo bilanç totjorn que mai en auça dei novèus aderènts : 315 aderènts an aportat sa caucien au Forum, 135 associaciens escampilhadas sus tot lo territòri regionau, dos consèus despartamentaus, 20 vilas o vilagis, 15 entrepressas, e 120 elegits a titre individuau. En meme tèmps rapelava que la dinamica dau Forum a de si confrontar emé leis atacas de la chorma enrabiada qu’a decidat de partir en guèrra contra leis ideaus mistralencs e occitanistas de l’unitat de la lenga pèr auçar de muralhas a l’entorn dau relarg provençau coma dau relarg niçart, e surtot metre en garda leis elegits qu’an sachut empaumar, congreiant ensin de gròs embròlhs qu’entramblon pron la promocien de la lenga.    

   Reson de mai pèr bastir una comunicacien eficaci pèr lo Forum d’Oc : tal èra lo sugèt de la Convencien. Dos especialistas adusien son espertisa, Mirèlha Benedetti, conselhera regionala e presidenta de l’Agenci pèr l’Environament, e Renaud Savy, de l’agenci Komgourou, consèu en comunicacien ; puei lei tres comissiens permamentas dau Forum, dins lei domènis de l’ensenhament, de la comunicacien, e dau desvolopament, si recampavon pèr metre en comun sei realisaciens, sei problèmas, e sei progèts, avans de nen faire la restitucien au grope e d’entèndre Matieu Casanova tirar lei conclusiens  de la sessien.

   Pron d’escambis posquèron tambèn si debanar entre lei participants dins lo tèmps de l’acuelh, de la pausa, e de l’aperitiu òufrit pèr la Vila, lo tot perfetament bailejat pèr l’associacien pertusenca Li Reguignaire dóu Luberoun, que son travalh emé la Vila de Partus servèt de cas d’estudi pèr demostrar una colaboracien entre una estrutura  militanta e una equipa municipala.

Alan Barthélemy-Vigouroux

Retorn