|
|
|
|
 |
D'aicí e de'n pertot |
 |
 |
lo BILHET D'ANDRIEU ABBE. Slow food en Vau Estura |
 |
|
 |
| 27 / 04 / 2021 |
406 lu(s) |
 Lo bilhet d’Andrieu ABBE
Slow Food en Vau Estura
"The l'Escaroun consortium and the Lou Barmasset farming cooperative have since created a renaissance for the local breed"... Siam modèrns en Vau Estura, la reclama per l'anhèu de raça sambucana si fa en italian e en englés. Siam pasmens a quatre torns de ròda de Larcha, Jausiers, Barceloneta e lei toristas francofònes que passan a Pontebernardo, Pietraporzio e Demonte son probablament dètz còps mai nombrós que lei toristas englofònes.
Se voliéu "positivar" dirieu que lei responsables de la redaccien d'aqueu prospectus si son pensats que lei Francés que lo ligien èran capables de comprendre l'italian tengut còmpte de la parentèla entre lei doas lengas. Ailàs, lei nacionaus francés estudien de mens en mens l'italian au colègi e au licèu e aquelei que lièjon l'italian si fan pus cambeta.., aquò tanben dins lei familhas d'origina italiana.
La chausida de la "Fondazione Slow Food" pausa lo problema de l'englés coma unica lenga de comunicacien. Aquelei que me lièjon coneisson mon ostilitat a n'aqueu sistèma que nos mena au nivèu zerò de l'uniformisacien. Leis aparaires dau slow food, lo contrari dau fast food se compreni ben, duvrien admetre que si parar dau mau manjar e dau mau parlar (lo globish, l'englés de comunicacien basic) van ensems. L'englés, perqué non, sus lei reclamas de la Vau Estura, a condicien que li ague tanben l'occitan e lo francés.
"Africa begins at Calais" dison leis Englés. "La gastronomia s'acaba at Calais" dison lei Francés. Parlar de bòn manjar en englés es coma se voliam parlar d'esquí en bambara. Manca lo vocabulari adaptat. Convendrié que leis englofònas lipets, son de miliens, aprenguèsson l'occitan, l'italian e lo francés per poder ben parlar de ce que tastan.
|
Retorn
|
|
|
 |
|
|
|
|
