|
|
|
|
 |
D'aicí e de'n pertot |
 |
 |
Un novèu materiau pedagogique pèr l’aprentissagi dau provençau en mitan escolari |
 |
|
 |
| 22 / 12 / 2020 |
403 lu(s) |
L’AELOC en partenariat emé l’ostau d’edicien Edisud vèn de sortir la promiera partida d’un materiau pedagogique novèu pèr l’aprentissagi dau provençau. Es estat conçut pèr Roland Boyer, dòutor ès letras, ancian conselher pedagogique de lenga e cultura regionala dins lo despartament dei Bocas dau Ròse. L’obragi resulta d’anadas d’esperimentacien dins lei classas mé l’equipa d’ensenhaires e de formators coordonada pèr l’autor. L’etapa atuala de la publicacien visa lei grandei classas de l’escòla elementari, dau CE 2 au CM 2, e de la 6° dei colègis. Si compausa d’un libre dau mèstre e de fichas pèr l’escolan que pòdon èstre aisadament duplicadas. La tòca es de fondar l’apròcha de la lenga sus de situaciens de comunicacien e de changis entre escolans, destraucant sus de sequèncis que sa pertinènci es estada longament esprovada. Lo libre dau mèstre provesisse una guidança precisa à l’ensenhaire a travès d’una metòda novatriça e rigorosa. L’apropriacien progressiva deis elements de la lenga s’incarna dins de dialògues e istòris en rapòrt mé l’univèrs de l’enfanci. L’orau e l’escrich s’apontèlon reciprocament e son estrechament ligats dins lo debanament de la demarcha. L’apròcha es completada pèr de situaciens que menon l’escolan a destraucar leis estruturas fondamentalas de la lenga e de lei metre en paralèle mé sa descubèrta d’aquelei dau francés prescrichas pèr lo programa d’estudi de la lenga. Lei tèstes son enregistrats e son acessibles a grati sus lo site de l’AELOC.
Aquela promiera etapa dins la publicacien d’aqueu materiau pedagogique va èstre sueivida d’un ensemble pèr l’escòla mairala, d’un autre pèr lei pichonei classas de l’elementari, e d’un tresième pèr l’utilisacien de l’occitan coma lenga d’ensenhament à travès d’una larja mòstra de situaciens pedagogicas chausidas entre lei matematicas, l’istòri e la geografié, lei scièncis, l’educacien fisica, etc.
Alan BARTELEMY-VIGOUROUX
● Roland Boyer. Apprentissage du provençal – Dau tèmps de l’Escòla. Le livre du maître. Fiches pour l’élève. 18 € lei dos, 9 € cadun. De comendar sus lo site de l’AELOC, La boutique en ligne : www.aeloc.fr
|
Retorn
|
|
|
 |
|
|
|
|
