Acuelh / Accueil
Editoriau / Editorial
D'aicí e de'n pertot
Sociau / Social
Politica / Politique
Istòria / Histoire
Cartabèu/Bloc-notes
Societat / Société
En revista / En revue
Botica / Boutique
Forum
Contact

   
   

D'aicí e de'n pertot


LO FORUM D'OC REGARDA VÈRS LA CATALONHA. Alan BARTHELEMY
17 / 06 / 2019 41 lu(s) 
                 POLITICA LINGÜISTICA

LO FORUM D’OC REGARDA VÈRS LA CATALONHA

   Es plus besonh de presentar lo Forum d’Oc de Provença-Aups-Còsta d’Asur ai legèires d’ Occitania - Lo Cebier, qu’a sueivit despuei sa creacien en 2014 lei manifestaciens d’aqueu recampament inedit, lançat pèr la convergènci dei rivaus d’aièr, lo Felibrige e l’IEO, e qu’a amolonat ara a l’entorn de son mevolhon mai de 450 entitats autant desparieras qu’associaciens, entrepessas, comunas, dei pus grandas ai pus pichonas, emé d’artistas e d’elegits, e qu’arrèsta pas de crèisse pèr demostrar que la defènsa de la lenga despassa la militança classica.

   Sortir dei rodans èra justament lo sujèt de la Convencien dau Forum tenguda as Ais de Provença lo 18 de Mai. La matinada permetié au publique d’estudiar cinc eisèmples de demarchas que permeton d’apelar la preòucupacien de la lenga dins de mitans monte es pas dòuminanta. Ensin, après que lo presidènt dau Forum, lo Majorau Gui Revest, aguèt  fach un tablèu de la situacien generala dau Forum, Miquèu Arnaud presentava l’acien de son associacien dins la messa sus pèd dau Pargue naturau regionau de la Santa Bauma pèr li far intrar la lenga. Hervé Tainton, au nom dau Speleo-club de Sanari, presentava la plaça que pòu tenir la lenga dins la denominacien dei descubèrtas dau païsagi tant dins lo monde sosterran que dins lei relèus carstiques. Alan Guiony fasié parier dins lo travalh de son associacien patrimoniala consacrada a n un ermitagi dins lo terraire de Trets. Un videofilme dau Centre d’Estudis de la paraula d’òc mostrava un biais òuriginau de praticar la lenga dins l’organisacien d’un cafè provençau as Ais. Enfin, Gui Revest describié son implicacien dins lo projèt de geòparc de la montanha dei Maures.  

   Pèr lo rèsta de la jornada, la Convencien avié chausit de s’endraiar sus la relacien occitanò-catalana. La Vila das Ais vòuguèt aprofichar l’òucasien pèr inaugurar a n una fenèstra dau CEP d’Oc un veiriau òufrit pèr l’artista Jean-Charles Escribano,   e celebrant l’amistat ancestrala entre Provença e Catalonha. Dins l’après-dinar, organisada en partenariat emé lo Ceucle Catalan de Marselha, après un videofilme dau CEP d’Oc donant la paraula ai responsables dau Jornalet, publicacien occitana en linha basada a Barcilona, Felipe Martel de l’Universitat de Montpelhier porgié una perspeitiva sus lo tèma Catalonha, Provença, País d’Oc : una fraternitat istorica d’incarnar.  Puei Jòusè Deulofeu, professor emerite a l’Universitat das Ais, animava una taula ronda monte lei professors de catalan d’aquela Universitat presentavon lei contenguts dau colòqui que son a preparar pèr lo mes d’Outòbre sus lo tèma Lei país catalans e la Provènça : regards crosats, e Josep Ferres, architèite, donava son esclairagi sus lo ròle de la lenga dins l’évolucien  d’una  societat multiculturala, en s’apielant sus son esperiènci de la costrucien d’una mosquèia dins una vilòta catalana.

   Un rendut-còmpte de la Convencien serà montat sus lo siti dau Forum d’Oc e la manifestacien venènta, lo Congrès dau Forum, si debanarà lo 5 d’Outòbre a La Sanha e abordarà la question mai que mai brulanta de la trasmissien de la lenga ai joinei generaciens.  

Alan BARTHÉLEMY
Retorn