Acuelh / Accueil
Editoriau / Editorial
D'aicí e de'n pertot
Sociau / Social
Politica / Politique
Istòria / Histoire
Cartabèu/Bloc-notes
Societat / Société
En revista / En revue
Botica / Boutique
Forum
Contact

   
   

D'aicí e de'n pertot


L'ecologia presa en ostatge. Jaumelina Arnaud
08 / 07 / 2017 399 lu(s) 
L’ECOLOGIA PRESA EN OSTATGE

En França e en particular en Provença:

   France Nature Environnement, Convergence écologique des Bouches du Rhône, Les Amis de la terre e lei pargues regionaus de Verdon e de Luberon s’acampèron per demandar l’anullacion de l’arrèst prefectorau dau 29 de novembre de 2012.
   Lo 8 de junh, lo tribunau administratiu de Marselha anulla l’autorizacion d’esplecha de la centrala biomassa UNIPER de Gardana, grop alemand (ex E.On). Lo tribunau estima que l’impact sus lei forèsts dau Sud Èst es sosestimat.
   Lei jutges denóncian dos prejudicis :
   L’estudi foguèt fach dins un perimètre de 3 km alora que la centrala crema de lenhas copadas a pus de 100 km e de còp a 250 km dau site.
   Leis anar venir dei camions per alimentar la centrala an pas estat pres en còmpte, la pollucion atmosferica va èstre demultiplicada.

Reaccions unanimas d’actors pas sovent d’acòrdi :
UNIPER « es suspresa per aquela decision penalizanta per ela, sei salariats e per l’economia locala, seis emplecs. »
   De ramentar qu’an respondut a un apèu d’ofèrta e que l’Estat a validat lo plan de provesiment, que l’estudi d’impact es conforme ai tèxtes en vigor.
   De conclure « es un còp dur per leis energias verdas ». Van faire apèu d’aquesta decision, qu’autoriza pasmens la perseguida per un tèrme de nòu mes dins l’espèra d’una novèla autorizacion.

   Lo Conseu Regionau Provença País aupencs País niçart representat per son novèu president Renaud Muselier (Les Républicains), denóncia la pèrda d’emplecs. Quora i a d’interèsts economics e financiers (la region a una produccion insufisenta en electricitat) se tòrna vers l’umanisme per assajar de faire acceptar lo gigantisme d’aquela centrala la pus gròssa de França.
   Per memòria la partença d’UNILEVER, grop anglo-neerlandés, de Gèma per anar esplechar lo tè dins de país mens ben protegits aviá pas pausat de problèmas etics. Lei salariats an degut constituir la cooperativa Scop-Ti que a l’ora d’ara a sauvat son activitat après cinc ans de lucha.  
   La CGT tanben reclama la perseguida de l’activitat, se dich inquieta per lei 180 emplegats dau site. L’emplec es una prioritat, es un factor que permete ai gents de viure d’un biais decent mai l’avenidor de la planeta es tanben un enjuec màger e concernisse tota l’umanitat. Un consumiment deis energias renovelablas, pus economas pòu e dòu èstre possible, a condicion que siegue una volontat politica e subretot pas se cambiar en cantatge.

   La posicion de nòstre ministre de la Transicion ecologica e solidària, Nicolas Hulot, va èstre determinanta a condicion que siguem vigilents ! Devèm èstre fèrmes coma dins lo cas de la LGV Sud Sainte Baume e un pauc mai luench, de l’aeropòrt de Notre Dame des Landes. De chaples dei gròs que van tot degalhar, perqué ? Per que ganhar quauquei minutas.
Ais USA :
   Donald Trump vòu finançar la construccion de la muralha de la vergonha entre Mexic e leis Estats Units. Devent ecologic per un còp imaginant una frontiera que seriá materializada per de panèus solars, « polida estructura » auta de 12m.
   Après aver dich que leis energias renovelablas èran pas rentablas, èstre sortit dau Tractat de París, lo president Trump fa la promocion de l’energia solara !

   Es la negacion de l’evidéncia, dins aqueu relarg aqueste projècte pòu pas foncionar. D’efèct l’abséncia de centralas fotovoltaïcas pròchas e l’abséncia completa d’abitacions fan qu’una linha d’auta tension seriá necessari per adurre l’energia producha e aquò a un còst fòrça important qu’anullariá tota rentabilitat.
Lei politics son capables de tot. Per promòure seis idèas, pòdon emplegar de concèptes umanistes, per tocar la sensibilitat dau mond e ansin embornhar lei pus creserèus.
L’estiu va èstre caud de mai d’un biais !

Jaumelina ARNAUD

Retorn