Acuelh / Accueil
Editoriau / Editorial
D'aicí e de'n pertot
Sociau / Social
Politica / Politique
Istòria / Histoire
Cartabèu/Bloc-notes
Societat / Société
En revista / En revue
Botica / Boutique
Forum
Contact

   
   

D'aicí e de'n pertot


LO FORUM D'OC (Actualitat e Seguida) Alan BARTHELEMY-VIGOUROUX
18 / 10 / 2016 64 lu(s) 
POLITICA CULTURALA

                   FORUM D’OC

   Lo Forum d’Oc de Provença va sus sei tres ans
184 associaciens, entrepressas, vilas, despartaments l’an dejà rejonch

   La necessitat de bastir un recampament de totei lei fòrças que sostènon la promocien de la lenga d’òc en Provènça èra una urgènci. Vint ans de tèmps sei champions an tentat de pensar lei plagas que lei guèrras fratricidas entre mistralencs e occitanistas avien dobèrt. A faugut que se descadenon leis enrabiats que vòlon espeçar la lenga pèr solidarisar enfin lei bessons eterosigòtes, coma lei sòna Rainier Moucadel. Lo pelau monte vèn de nos mandar la confiscacien dau nom de nòstre espaci pèr son centre emé la benedicien parisenca va encara aprefondir lo besonh de faire frònt entre periferiques. Se l’eiretagi dei paires fondators e de Robèrt Lafònt a pena avalit es ensin ravajat, nos fau trovar aicì entre nautrei la fòrça de s’autonomisar, e d’inventar un biais novèu de presentar l’imagi de nòstra lenga e de son territòri.

   Lo Forum d’òc s’es congreiat a l’entorn de ce que lo mistralisme, encara dòuminant en Provença, e l’occitanisme especifique que li avèm fach trachir a grand pena an de melhor : la fe dins l’unitat de la lenga mé sa totala diversitat, perfetament impermeabla  a tot pantai de fabricacien d’un occitan referenciau. Es aquela marca qu’afortisse la teneson promiera dau Forum d’Oc.
   Mai lo prefach es espetaclós, e demanda de vòlha e de mosca a de militants pas totjorn pron gais pèr s’atacar a tot lo pan qu’an sus la canissa. Si trata de metre en convergènci de centenas d’iniciativas que si conoisson pas e que si fan pas conoisse ; si trata de faire espelir e de canalisar un sentiment difus mai fons d’apartenènci a n una personalitat comuna ; si trata enfin de faire una fòrça sociala d’aquela dinamica. Pas totjorn aisat de gardar l’endrechiera quand cadun es solicitat pèr l’aparament dei realisaciens totjorn precaris qu’a adobat dins son relarg.  

   Pasmens l’envam es au rendètz-vos. Una equipa nombrosa forma un malhum permanent pèr far avançar lo projèt sus lei tres talhers que lo Forum a chausit de cavar : lo desvolopament duradìs e lei poders locaus ; l’ensenhament e la formacien ; la cultura e la comunicacien. Dos recampaments pleniers cadencien la vida dau Forum dins l’anada, la convencien e lo congrès. La convencien es la messa en comun intèrna de seis òbras que serà facha lo 8 d’Outòbre a Pueilobier, vilagi au levant das Ais de Provènça, sòci dau Forum. Lo congrès a pèr tòca d’espandir au defòra l’acien e leis amiras dau Forum. En Març d’aquesta anada, si tenguèt dins l’anfiteatre dau Consèu Despartamentau dei Bocas dau Ròse, eu tambèn sòci dau Forum, qu’aguèt pena de contenir tot’aquelei que li volien venir. L’an que vèn es sota lo patronagi dau Consèu Despartamentau deis Aups d’Auta Provença, autre sòci mai, que si debanarà.

   Lo Forum d’Oc es pas una fada que nos tirarà d’afaire pèr mascarié, mai es una responsa concrèta a la mesura de nòstrei fòrças, e lo solet camin qu’avèm trovat pèr avançar ensems. S’amerita que cadun li pòrte pèira.
Alan Barthélemy-Vigouroux

Convencien dau Forum d’Oc de Provença-Aups-Còsta d’Asur. Dissata 8 d’Outòbre 2016 a 13 oras 30. Sala dei Fèstas, 13114 Pueilobier.
Retorn