|
|
|
|
 |
En revista / En revue |
 |
 |
Psicòsi au palais -Article paru dans La Marseillaise |
 |
|
 |
| 09 / 06 / 2016 |
396 lu(s) |
 Au fieu de l’actualitat
PSICOSI AU PALAIS. Cronicas dins l’ascla dau temps
Es lo darrier libre dau Gerard Tautil (1) que farem cas dintre lei publicacions recentas de l’IEO, colleccion ensages : 65 cronicas chausidas demieg 140 pareissudas despuei 1990 dins lo Cebier - la letra occitanista. Ambé un prefaci-capelada de l’Arvèi Guerrera e 13 dessenhs umoristics e jugadors de nòstre amic Joan Loís Racochòt, per illustrar de tèxts druds, caparruts, clarament identificables dins una critica au còp constructiva e satirica. En brèu, una lectura quotidiana ambé de bericles occitans, de legir o tornar legir, per dire que la question occitana es totjorn presenta dins l’actualitat societala, culturala e politica (locala, provençala, occitana, francesa, europenca e mondiala !). E l’autor de dire son franc valentin, engatjat a bòrd dins la revendicacion nòstra : « Quand lo monde chanja, quand lo mercat se deslocaliza, quand l’austeritat pica a la porta, soventei còps la classa politica au poder inventa la quadratura dau ceucle : parlar de cambiabament sens ren chanjar… » Constat d’evidéncia bastida dins l’articulacion d’una pensada plurala e pron organizada en cinc capítols : Lo pes dei mots, Quora lo centralisme tira son vin, Una societat estraviada, Quina Euròpa ? Pòbles dau Monde. Lo palais es omnipotent dins una constitucion que fa dau president lo donaire d’òrdres e dau parlament un cambra de registrament… E la revendicacion dau viure e travalhar au país es totjorn presenta, emai dins lo bandèu de la cuberta de presentacion dau libre, una presentacion IEO de tria, tricolorizada, ambé la fotografia de « la Republica en dòu » d’una exposicion de Ben…
Per avans, sabètz que per faire venir l’alhòli, lo cronicaire deu suggerir l’essenciau en quauquei formulas, capitar puei la sortida, question de logica que enfortisse la coeréncia dau prepaus. Per tot assai que capita ben, es lo cas podèm dire, pereu ambé la clartat de l’explicacion demostrativa ; ambé una umor que sente a cebola e vinaigre que lei dessenhs refortisson. Un biais de dire que darrier lo mirau avèm pas de nos regaudir de tot çò que nos es impausat, una mena de potinga que devèm engavachar, rarament odor de convivéncia…E lo pastís dau dessenh de J-L Racochòt sus lei migrants a de se negar e lei secors que van per pescar lei diplomats, es agressiva : es ren que l’imatge de nòstrei societats onte se costejan pauretats dei mai grandas e abondàncias dei sobras, dei causas superfluas a bòudre. Siam jamai estats aitant dins l’inegalitat de dos mondes ai confinhs de la revirada dei drechs de l’òme tant cridats e oblidats d’un exagòn geocentrat e gosta-solet !
Aquesta publicacion es una mena de resson de l’occitanisme d’ara, viscut « grandor natura » ; un agach politic descomplexat per dire, ambé un risolet se podèm, que lo Monde fa avans entre chauchavièlha e pantaiada, que nos fau enfaciar barbaria e progrès, conformisme e crida de libertat per viure o subreviure. Un libre d’esper e de solidaritat, de ciutadan e non pas de santibèli, per se levar de la psicòsi d’Estat, buta d’una societat occitana en cèrca de se lo santclame dau jorn.
----------------------
Psicòsi au palais. Cronicas dins l’ascla dau temps. IEO edicions, colleccion ensages. 180 paginas. Dessenhs de J-L Racochòt. Abrieu de 2016- De comandar a IEO edicions o a Lo Cebier BP 37 83870 Signes/Signa. 16€ +3€ de port « letra seguida ». (Chèc à l’òrde de G.Tautil)
(1)Lo darrier libre, après un estudi de toponimia provençala (« Toponymie de Signes. Un village provençal et des hommes »). Lo libre venent, publicat a la debuta de l’estiu, serà « Le roman national français, au défi de l’extrême droite ». Ne’n tornarem parlar.
|
Retorn
|
|
|
 |
|
|
|
|
